Son illər yerli və qlobal rəqəmsal marketinq mütəxəssisləri tərəfindən ən çox müzakirə olunan mövzulardan biri “Search Engine Optimization” və ya Axtarış Sistemlərinin Optimallaşdırılması (bundan sonra SEO) hesab edilir. Şirkətlər üçün SEO mövzusunu qiymətli edən əsas səbəblərdən biri odur ki, bu ödənişsiz yaxud xərcsiz trafik deməkdir. Qısacası, müştərilər axtarış sistemlərindən (Google, Yandex, Bing və s.) istifadə edərək axtarış edirlər, sizin axtarış nəticələrinizlə qarşılaşdıqları zaman klikləyib saytınıza keçirlər. Rəqəmsal marketinq peşəkarları üçün qarşıda duran əsas sual isə odur ki, “nə etmək olar ki, saytımızın axtarış nəticələri mümkün ən yüksək reytinqi alsın, yaxud saytımız axtarış nəticələri arasında ilk sıralarda çıxsın?”

 

Axtarış davranışları

SEO istiqamətində effektiv iş görə bilmək üçün istifadəçilərin axtarış davranışlarını başa düşmək lazımdır. Hər saytın yaxud şirkətin auditoriyasının axtarış davranışları özünəməxsus ola bilər. Xüsusi bir biznes istiqamətinə baxmazdan öncə, ümumi davranışlara baxmaq tövsiyyə olunur. İstifadəçilər əsasən 4 əsas məqamda (yaxud məqsədlə) axtarış edirlər. Bu məqamlar “öyrənmək istəyi məqamı”, “getmək istəyi məqamı”, “etmək istəyi məqamı” və “almaq istəyi məqamı” olaraq qruplaşdırılır. Bu məqamları başa düşdükdən sonra sayt sahibləri yaxud şirkətlər çalışmalıdır ki, bu məqamları əhatə edən kontent və funksionallıqları saytlarına əlavə etsinlər.

 

SEO-nu təkmilləşdirmək üçün 3 səbəb

“SEO nə üçün önəmlidir?” sualına bir çox cavab tapmaq olar. Bu məqalədə SEO-nun şirkətimiz və saytımız üçün yaratdığı 12 dəyərdən danışacağıq.

1. Orqanik kliklər reklam xərclərinizi azaldır

Effektiv SEO imkanlarına malik veb saytların ümumi trafikinin bölgüsünə nəzər yetirsək görərik ki, əksər hallarda ən böyük hissəni orqanik trafik (yaxud axtarışdan gələn trafik) tutur. Bu nə deməkdir? Sizin SEO çalışmalarınız nəticəsində veb saytınız Google yaxud digər axtarış sistemlərinin tələblərinə və standartlarına cavab verir, axtarış sistemləri sizin veb saytınıza yüksək reytinq verir, istifadəçilərin axtarışı zamanı veb saytınız ilk sıralarda çıxır. Təbii ki, axtarış mövzusuna birbaşa uyğunluq təşkil edən saytların ilk sırada çıxması həm də onların yüksək CTR (clickthrough rate) əldə etməsi mənasına gəlir. Axtarış nəticələrindən gələn yüzlərlə, minlərlə, hətta onminlərlə kliklər əslində reklam xərclərinin azaldılması mənasına da gəlir.

2. Yüksək SEO reytinqi etibar qazandırır

İstər e-ticarətlə məşğul olun, istərsə də ənənəvi satışla, şirkətinizə məxsus saytın axtarış zamanı ilk pillələrdə çıxması istifadəçilərin etibarını qazanmaqda ciddi rol oynayır. Praktika göstərir ki, əksər istifadəçilər axtarış zamanı ilk səhifədə, hətta ilk pillələrdə olan saytlara daha çox klikləyirlər. Araşdırma və təhlil onu göstərir ki, bu davranışın əsas səbəbi etibardır. Düzgün və effektiv SEO icra etməklə sayınızın və şirkətinizin etibarını artıra bilərsiniz.

3. Effektiv SEO satışınızı artırır

Araşdırmalar və praktiki nəticələrin təhlili göstərir ki, axtarış nəticəsində sayta keçid edən istifadəçilərin məhsul sifariş etmə ehtimalı daha yüksəkdir. E-ticarət veb saytları üçün bu üstünlük daha çox fayda göstərəcək, amma ənənəvi bizneslərdə də bunun əyani nəticəsini görmək mümkündür. Müasir rəqəmsal marketinqin əsas araşdırma mövzularından biri də, rəqəmsal fəaliyyətlərin qeyri-rəqəmsal mühitdə olan təsiridir. Əminliklə demək mümkündür ki, effektiv SEO biznesin sadəcə onlayn resurslarında deyil, həm də ənənəvi satış kanallarında da öz təsirini göstərir.

 

Nəticə

Peşəkar e-ticarət şirkətləri, yaxud rəqəmsal resurslarının inkişafına peşəkar yanaşan şirkətlər SEO məsələsinə çox ciddi yanaşırlar. Bunun ən başlıca səbəbi isə onun maddi və performans nəticəsidir. Müasir dövrdə SEO tətbiqinə qeyri-ciddi yanaşmaqla siz sadəcə SEO tətbiq edən rəqiblərinizdən bir addım geri qalacaqsınız. Buna görə də SEO-nun biznesə təsirini daim araşdırmalı, axtarış sistemlərinin dayanmadan dəyişən və inkişaf edən alqoritmlərini öyərnməli və tətbiq etməliyik ki, reklam xərclərimizi azaldaq, müştərilərimizin etibarını qazanaq və daha çox satış edək.